الما والضو

الما والضو

حكت كساتي من صبري

سداها العرى والطعمة

لقصر بانيه فقبري

ساكنو جاني فالقسمة

مونتي دغمة حرفية

ماها جوعي والبسمة

داير صدري مطفية

حالها كي حال البرمة

عايشين اهما حيين

عيشني عايشها لعمى

غيرنا وصلو فين افين

وانا ما شابع نعمة

كلشي فيديه عصاتو

مأربو فيها والحكمة

شريها يا لي خصاتو

ضايم ضامة مندامة

زاد هزو ليه المنفوخ

ضامتو ما هي ضامة

علمونا ماكلت الخوخ

والخوخ اداوي زعما؟

هادا وعدك اسعدك

دايزة لينا الفهامة

سال من ضربك اهزك

ضربك الضو اهزك الما

البحيرة: قصة البغلة التي خانها أهلها

البحيرة

بغلتنا ولفات الدراس
والحرث وشلا خدمة
كانت علافتها نادر
والعين دلاها تالما
ولات تشرب في الغدير
بالقليل تصيب النعمة
باعها مولها للغير
ترعى في سواق الزحمة

قلة العقل وش تدير
ولا القلب تعمى
خيرها في الحين تنسى
دارها ركنة تحت السما
بالشريط تاكل العصا
فينكم قلوب الرحمة

بالدموع بكت زهرها
طاحت في دين الغشمة
خانها من كانوا أهلها
كواتها في يديها وشمة
كانت ترعى في الخير
والهنا والواحة والما
علفها فارنة وشعير
والفراش تبن ابهمة

واليوم حدث التغيير
لحسوا لها الناس السما
جادت بصغرها على العشير
واليوم طفات النجمة
والحرث وشلا خدمة كانت...

من اعداد: عبدالعزيز واكريم

خبزي

خبزي انا خبز فطير  

افبيتي مفرش حصير  

ما گرات فيه خميرة  

ما خفاك على خبز الشعير  

الفراش قليل اجعنا  

بابي حيطو حيط قصير  

قين نتا افين انا  

بيني ابينك فرق كبير  

تهنا امنين رجعنا  

حظنا غارق كيف البير  

لا صبر ايوب نفعنا  

ولا سايدنا الخضير  

           

من اعداد: عبدالعزيز واكريم

لالة قمر الزمان

لالة قمر الزمان

تاجها من دهب الوبان

الخلاخل محاصر فضة

كتزين رطل فالميزان

لوكان علي ترضى
نهديها ماس امرجان

سبحان لي صورها
نسخة فردة مول الشان

ترمق تزعزع الخلق
السيوف احرسو لجفان

الشوفة خفة البرق
لهداب نبال العدوان

قدها صمعة منصوبة
شامخة كي شجرة البان

طرفها يقتل مصيبة
ويل مول القلب العيان

الشعر ليل بلا گمرة
لكحل لونو فين ابان

فمها نحلة كتلسع
وردة حمرا فالفدان

حرها خمرة كترفع
اتحيي لي عمرو فان

ريقها احلى من لعسل
تعصر من شهدو كسان

علشفاه شتا كتنزل
دافية وثغرها عرگان

حادگة لحديث امغزل
صداقها مخزن سليمان

لا قاضي فيها يعدل
لا شهادة شهود العيان

دارها قبة في قلبي
تحفة في فن البنيان

عرشها منقوش ودهبي
ملمس حرير امزدان

هي من شهور السنة
والنسا في ديني رمضان

من اعداد: عبدالعزيز واكريم

رحبة بلا حسبة

السوق ديالنا دغيا كيعمر
بكري كتحل الرحبة
ها الصردية ها لبگر
بيعو وشريو مرحبا

مول الشكارة كيحضر
باغي يصيد لوجيبة
ناوي بالهمزة يضفر
بلحلال ولا بالربا

زربان اما فيه صبر
قلة العقل مصيبة
يقسم يكدب ويحلف
بلي بايع لكسيبة

شحال من سابق تخلف
جراه تقاد وحبا
يا الضايع دخل للصف
روم ليمن شد النوبة

الدنيا كترحل بالخف
اكتعطي بلا حسبة

من اعداد: عبدالعزيز واكريم

أيام الزغبية

قال نيني فشوف تشوف، لاش هاد الرهبة والخوف
قلت له الطبع ما ليه خفية، وطبعنا شايع معروف

قال لي فين المسؤولية؟ قلت له مستفة فالرفوف
قال والشحمة لمن هي؟ قلت له زيدها للمعلوف
قال لي فين طريق بنجدية؟ قلت له سول مول فروكي

أنا بالاصلية، راسي عريات امكشوف
فينك يا بلادي العزيزة، فينك يا زينة الحروف
فين الرزة والطكية، فين الحنة على الكفوف

فين الواد الالة صفية، والغراس على حد الشوف
عطشنا وخوات المطفية، نبتات الأرض الخرشوف
فين الصردي والبركية، فين الحنبل فين الصوف

فين عوايدك المنسية، تبكنة والمعروف

رجعت أيام الزغبية، فينك يا الفروكي... أووف

من اعداد: عبدالعزيز واكريم

ناس بلا قياس

ناس بلا قياس

عمرت ملمحبة كاس

وزعتو ما بين الناس

شي شرب اولا لباس

شي شرابي ضرو فالراس

الناس طبايع شلا

مول النية والوسواس

ها لي تلف القبلة

ها لي تيصلي بالناس

كاين لي عمرو تجلا

صمعتو رابت علقواس

كاين لي ولد النخوة

كاين لي كابر خماس

ها لي ماكلتو شهوة

ها لي مالف بالترفاس

منا لي ملكو لهوى

سهران ابايت عساس

يبكي ونين تكوى

گولو الله يحد الباس

شحال منا ميت الگلب

متملق ابلحاس

دارو كتشبه لدرب

جوج بيبان بلا عساس

دارو منو خبز القب

حاضر مرة، مرة خاص

لا نبي خوفنا لا رب

لا نصيحة لا لجراس

من اعداد: عبدالعزيز واكريم